JABA WRITTEN BY SOUFIYA S (PRE-BOOKING)

ചില പുസ്തകങ്ങളുണ്ട്, തുറക്കുമ്പോൾ മഷിയുടെ മണം മാത്രമല്ല, ഒരു ജീവിതത്തിന്റെ നനവ് കൂടി നമ്മുടെ വിരൽത്തുമ്പിൽ പടരും. സൗഫിയ എസ്. ന്റെ ​' *ജവാ* ' അങ്ങനെയൊരു പുസ്തകമാണ്.

ഒരു ചെമ്പരത്തിപ്പൂവിനെ നോക്കൂ... അഞ്ച് ഇതളുകൾ. ഒറ്റയ്ക്ക് നിൽക്കുമ്പോൾ അവ വെറും ഇതളുകൾ മാത്രം. പക്ഷേ, അഞ്ചിതളും ചേർന്നു നിൽക്കുമ്പോഴാണ് ആ പൂവിന് പൂർണത കൈവരുന്നത്, അതൊരു പൂവിന്റെ ഹൃദയമാകുന്നത്. സൗഫിയയുടെ ഈ കഥാസമാഹാരവും അങ്ങനെയാണ്. ചെമ്പരത്തിയുടെ അഞ്ച് ഇതളുകൾ പോലെ അഞ്ച് കഥകളിലൂടെയാണ് ഈ പുസ്തകം സഞ്ചരിക്കുന്നത്. ഓരോ ഇതളിനും അതിന്റേതായ നിറവും മണവും തുടിപ്പുമുണ്ട്. എന്നാൽ ചേർത്തുവെക്കുമ്പോൾ അത് 'ജീവിതം' എന്ന ഒരൊറ്റ പൂവായി മാറി വായനക്കാരന്റെ ഹൃദയത്തിൽ പതിയും.

ഇവ വെറും കെട്ടുകഥകളല്ല. ബാല്യത്തിൽ, ആരും കേൾക്കാനില്ലാത്തപ്പോൾ, തന്റെ ഉള്ളിൽ മൊട്ടിട്ട വാസനകളാണ്. കൂട്ടിന് പ്രോത്സാഹനത്തിന്റെ ഒരു വാക്ക് പോലും കിട്ടാതെ, കടലാസിന്റെ കീറത്തുണ്ടുകളിൽ കണ്ണുനീരിനോടൊപ്പം കുത്തിക്കുറിച്ച വരികളാണ്. അന്ന് ഹൃദയത്തോട് ചേർത്തുപിടിച്ച കല്പകവൃക്ഷത്തോടും മാവിൻ കൊമ്പുകളോടും പ്ലാവിന്റെ തണലിനോടും കെട്ടിപ്പിടിച്ചു പറഞ്ഞ രഹസ്യങ്ങളുടെയും ഓർമ്മകളുടെയും തുടർച്ചയാണ് ഈ കഥകൾ.

​മനസ്സിന്റെ അതിർവരമ്പുകൾക്കപ്പുറത്തേക്ക്, വേദനകളെയും സ്വപ്നങ്ങളെയും അക്ഷരങ്ങളാക്കി മാറ്റിയ ഒരു പെൺകുട്ടിയുടെ അതിജീവനത്തിന്റെ യാത്രയാണിത്. _ഇവിടെ ഓരോ കഥയും ഒരു ചോദ്യമാണ്, ഒരു തേടലാണ്, ഒരു നെടുവീർപ്പാണ്. ഒരിക്കലും ഉണങ്ങാത്ത മുറിവിൽ നിന്ന് വീണ്ടും വീണ്ടും പൂത്തുലയുന്ന ഒരു ചെമ്പരത്തിയുടെ വാശിയാണ് ഇതിലെ ഓരോ വരിയും._ 

​' *ജവാ* ' എന്ന പേര് തന്നെ ഒരു വിളിയാണ്; ചെമ്പരത്തിയെ നമ്മൾ സ്നേഹത്തോടെ വിളിക്കുന്ന പേര്. ആ വിളി കേട്ട് ഈ താളുകളിലേക്ക് കടന്നുവരുന്ന നിങ്ങൾക്ക്, 'ജവാ' എന്നത് ഒരു പൂവിന്റെ പേര് മാത്രമല്ലെന്ന് മനസ്സിലാകും. അത് സൗഫിയയുടെ ബാല്യമാണ്, അവളുടെ ഏകാന്തതയാണ്, അവളുടെ പ്രതിരോധമാണ്, അവളുടെ പ്രാർത്ഥനയാണ്.

​ഈ അഞ്ചിതൾ പൂവ് നിങ്ങളുടെ ഉള്ളിലും വിടരട്ടെ. ഒരു തുള്ളി കണ്ണുനീരായെങ്കിലും, ഒരു നേർത്ത പുഞ്ചിരിയായെങ്കിലും അത് നിങ്ങളിൽ ബാക്കിയാകട്ടെ. വായനക്കാരന്റെ ഉള്ളിലേക്ക് അഞ്ചിതളായി വിരിയാൻ കെല്പുള്ള ഈ നല്ല അക്ഷരങ്ങൾ സമ്മാനിച്ച, കഥകളെ തന്നെ ശ്വാസമായി കൊണ്ടുനടക്കുന്ന സൗഫിയക്ക് ഹൃദയം നിറഞ്ഞ സ്നേഹവും ആശംസകളും.

​പ്രജിത്ത് റ്റി

(കഥയേയും കവിതകളെയും സ്നേഹിക്കുന്ന ഒരാൾ)